بقلم / عبد الجبار المشيطي
المجلس اللي مات من كان محييه
وشيلت معاميله وقفل أوجاره
وبعد العزاء قفل وماحد دخل فيه
من بعد ماتدفي عن البرد ناره
راح الفقيد اللي بطيبه محليه
اللي على الواجب طويله شباره
عون القريب وعون من كان ناصيه
ريف الضعيف وعز ضيفه وجاره
وياليت راع الطيب ربي يخليه
اللي عن الخطار مايصك داره
خلوه مقفل بعد ماراح راعيه
ماغير نسمع بالمجالس اخباره
مرحوم ياللي غالي البن يشريه
ومايشري الا من غوالي ابهاره
من طيب صيته يرفع الراس طاريه
صحيح بعض الناس فقده خساره
وماني موضح شي بالصدر مخفيه
اخاف تقدح من الساني شراره
وبض الكلام الشين مالي غرض فيه
والشعر مثل الرمي يبغي ظفاره
والناس تعرف بالقصيد ومعانيه
ومن يكشف الاسرارتكشف أسراره
وكلن على ماقيل ذكره يكفيه
وكثر الحكي بالناس ماهو شطاره
واللي جهل بالطيب يحتاج توجيه
والوقت هذا وقت كسب وتجاره
وكلن على ماقيل شوفه يقديه
يمشي على كيفه وحسب اختياره
ولاخير باللي مايعرف المشاريه
ويجهل سلوم الباديه والحضاره
ومن ماوقف وقفة وفا مع بنيخيه
يقل من بين الرجال أعتباره
وصلاة ربي عد فرضن انصليه
على رسول الدين وضح مساره
