• ×

09:34 صباحًا , الأربعاء 16 ربيع الأول 1441 / 13 نوفمبر 2019

جديد الأخبار

تستضيف جدة خلال الفترة من ٩ إلى ١٢ سبتمبر ٢٠٢٠ م، المعرض السعودي الدولي لكرة..

رمضان في ذاكرة إنسان

زيادة حجم الخط مسح إنقاص حجم الخط
بث - إعداد : مرفت محمود طيب : 
حياتنا مليئة بالذكريات منها السعيد والأقل سعادة ومنها الحزين وتظل عجلة الحياة تدور ولا تتوقف .

فالذكريات الجميلة نجم يلمع في السماء يضيء لنا، ودرة فخر تتلألأ ونزين بها كلامنا، وناي نشدو به، وسفينة أحلام نركبها ونبحر بها عبر الأيام الحاضرة فتدخل الفرح على قلوبنا لمجرد تذكرها.
ومن تلك الذكريات التي تبقىٰ في المخيلة ذكريات شهر رمضان المبارك .

واليوم ضيفتنا من سوريا ستعرفنا بنفسها ثم تحكي لنا ذكرياتها مع شهر رمضان في بلادها سوريا وستحكيها لنا بلغتها الشامية الجميلة .

image

في البداية أحب أن أعرفكم بنفسي
إسمي: ميادة الجوبي وبشتغل بتنظيم الاحتفالات وتنسيق المناسبات وبالماركتنج.
أنا من سوريه (الشام ) تحديداً من منطقه شاميه اصيلة ، اسمها( العمارة )وحابه احكيلكن على اجواء رمضان عنا بالشام شي بياخد العقل وقد ماوصفت يمكن مابقول شي رمضان شهر كريم وشهر المحبه والتسامح والخير والكرم والبركه وبالشام الو نكهة خاصه من وقت يلي بيثبتوا انو شافوا الهلال بيبتدي التهاني والتبريكات والفرحة على الناس لانو شهر رمضان مميز وغير كل اشهر السنه وبيجينا اول يوم سحور عنا بالشام نص أهل البيت بيضل سهران والنص التاني بيناموا و بيجي وقت السحور والا منسمع صوت المسحراتي (ابو طبله ) عم يمشي بين الحارات ونحنا منكون ناطرينه لنسمع كلامه الحلو وهو عم يحكي عن رمضان وابو طبله هو اساسي لشهر رمضان وهون بتبتدي الناس تصحصح على صوتو لنتسحر ومافي احلى من هل اللمة مع تشغيل الراديو لنسمع الامساك شي رائع غير الوصف وبعد مانخلص سحور الكل بيروح لصلاة الصبح وشي بيرجع بينام وشي بيروح على الشغل وعنا بقى نهار رمضان اذا بدك تحس بجو رمضان بتنزل على منطقه الميدان وهي منطقه شامية للأكل والشرب والحلو والمطاعم وبتشوف الناس كلهن بيباركو لبعض برمضان منظر بيفتح النفس من جمالو على يمينك بياع عصي التمر هندي وقمر الدين وعرق السوق وقدام شوي بياع الحلو وربات بقشطه والنهش والقطايف بالقشطه والناعم مع الدبس ونسمع صوت البياع عم يغني ويتغزل بكل نوع ومن طرف الفول المدمس والخضرا الطازجه من نعنع وبقدونس والبقله مشان الفتوش والتبوله والفجل وريحه الخضرا بتفتح النفس ومنظر بياخد العقل وبدك تشوفي منظر الحارات والشوارع قبل المغرب يلي رايح لعند اهلوو ويلي رايحين لبيت زوجها ويلي ضاليين ببيوتهن ، الله على الشام قبل المغرب وبتشوفي كيف الجيران بيتساكبوا الاكل لبعض جيراننا بيت الاغا بعتولنا كبه لبنيه وجيراننا بيت عابدين بعتولنا لحمه بالصينيه ونحنا بعتنا لجيراننا صحن من القطايف.

ووقت آذان المغرب العيله بتجتمع على السفرة وهون احلى منظر بتشوفوه بحياتكن على السفرة موجود المحاشي والكبه لبنيه والفول والفتوش والشوربه وهاد يلي بده عصير عرق السوس ويلي بدها عصير تمر هندي ويلي ويلي الله على هل اللمه وقت الفطور وقت أذان المغرب على فكرة قد ماحكيت ووصفت مارح كون وصفت الشعور بهيك اجواء روحانيه ومنخلص الفطور من هون والشاي بيكون جاهز مع القطايف بالقشطه البلدي والنهش .

وبعدين بيجي وقت صلاة التراويح وبتشوفي الناس كيف راكضين على المسجد اجواااء روحانيه بتاخد العقل وكل يوم برمضان له خاصيه غير اليوم يلي قبلو واحلى الليالي ليله القدر هون هي الليله بتكون غير شي الناس بتحضرلها واسمها (ليله الاحياء ) كل واحد بيسأل التاني شو وين رح تحييها لليله القدر بتخلص هي الليله وبيجي وقت نزلات السوق مشان نشتري لبس العيد وبتشوفي الناس مع ولادهن بالاسواق شي بسوق الحميديه وشي بسوق الصالحيه وكل الاسواق بتضل فاتحه للصبح بليله العيد وبيجينا المعمول لازم كل بيت يعمل معمول الجوز والفستق والعجوة وبيجتمع الاهل والاخوات ليتساعدوا بشغل المعمول ومعهن منشتري حلو البرازق والغريبه والبقلاوة هدول تجهيز للعيد وانا بحب عايد عليكن وباركلكن بشهر رمضان ربي يجعله شهر مبارك عليكم جميعا ومافي احلى منك يارمضان بنت الشام ميادة.

 0  0  
التعليقات ( 0 )

القوالب التكميلية للأخبار

جميع الأوقات بتوقيت جرينتش +4 ساعات. الوقت الآن هو 09:34 صباحًا الأربعاء 16 ربيع الأول 1441 / 13 نوفمبر 2019.