بعض البشر عندي صغيرين الاحجام
لا قدر .. لا شيمه ولا من رجوله

أمثالهم ينداس من تحت الاقدام
لو أنهم من قوم أصل وحموله

عار على عودٍ عزيزٍ من أكرام
اللي على الطالات نوّخ ذلوله

عودٍ عنا به واعتنى فيه ماضام
راهن على وسام التحدي بطوله

وخابت رجاوي هقوته بعد ماقام
واشتد غصنه وانحى في ميوله

كسر شموخ النفس كسره للاقلام
وتعوض الله بعد بارت حلوله

مآ يدري انه علكة أفواه الاقوام
اللي حصاد إلسانهم حد شوله

لبس العمايم والعُقل ماهي أحلام
ولا تنتمي لا اشباه من هز طوله

لو أن صدور الامر بيدي والاحكام
غطوه وشيله والنساء غطرفوله

إحقاق ورب البيت لآ قل الاقزام
اللي الحشيمه تعتذر من فعوله