التمع بيد النجيب ابن النجيب=سيف عز وبارقه جدا عجيب
للشعر نادى ولازم نستجيب=والشرف كله لمن لبى واجاب
(فيصل) ابن اللي بكى فرقاه كون= ( خالد ) ومهو مثل خالد يكون ؟!!
والعيال لطيب ابوهم يرجعون=اشهد انه ذيب خلّف له ذياب
(فيصل) الشامخ مع جبال الجنوب=فوق هاماته برد طيبه يذوب
ويتسلسل نهر عذب بكل صوب=السهل منه انتعش ويا الهضاب
الامير اللي تواضع وارتفع=وباللتي هي أحسن (السيه) دفع
من طلب منه الشفاعه له شفع=فاتحٍ للصلح بين الناس باب
يسعد اصحاب الحدث كانه سعيد=ويتفقد من توفى له فقيد
واصل وْنعم العزا .. نعم الصديق=حاضرٍ ماقد تغيب او أناب
عز شان الخيل واسهم بالفكر=انصف الشعار واحسن للشعر
فيه يتباهى القصيد ويفتخر=واقعٍ ملموس مافيه ارتياب
والدليل إني بهالليله هِنا=مع رموز القاف نحيي حفلنا
والتنافس شد فيما بيننا=ومابنا اللي مايبلغها الزهاب
سيف هيبه للقصيد وْأي سيف !!=ماهو لكفٍ ركيكٍ او ضعيف
هو هدف سامي ومقصدنا شريف=وكل مجتهدٍ يشاوف للثواب
ياهجوسي لك على المعنى جميل=كم سقيته من خيالك سلسبيل
ما عن العليا وقمتها بديل=قدها .. إصعد .. تقدم .. لاتهاب
وكان دانت لي فهذا اللي ابيه=ذا طموح وواجبي اسعى اليه
وان تنحت فالحكم حتما نزيه=مابها شرهه ولا فيها عتاب
ويكفي اني التقيت بهالحضور=وان ( أبها ) قابلتني بالزهور
وذا شرف وسرورما مثله سرور=خاطري بهل الجنوب اليوم طاب
