أرحبي يَالقوافي واغرفي كل صافي=وخَـلِّي الكل راوي من بحور القصايد
دام فيصل مقامه صار نظمك أمامه=اشمخي كالنداوي في نهار الهدايد
واشرحي عن فعوله لا ثـَنَـتْ دون قوله=في بيان وخفاوي وبالرخا والشدايد
إستَـلَم للأماره ضيغمِي النماره=وضَـمّ بين الحناوي حب للشعب شايد
ورَحبَت كل هامه بالسراة وتهامه=بالكريم اللفاوي يوم صار السنايد
وبارك الله بجهده وازدهر كل عهده=في جميع النحاوي جمع والا فرايد
وكل شبر بعسير للتقدم يسير=والتطور رقاوي والعمار (إ)يتزايد
والمشاريع قَامَت والسياحه تَـنَامَت=وكل قَـفْـر(ن) خلاوي صار رَوُض ورغايد
والمعارف دَعَـمْـهَا وشَجَّـع اللي خَـدَمْـها=وأصبح العلم قاوي وأصبح الجهل بايد
والشيم والرياسه والأدب والسياسه=عند زبن اللجاوي مَجدهِـنَّـه تلايد
ورحمته والمروفَه للذي به كلوفَه=مثل بلسم مداوي للطعون الغمايد
وتنثر الجود كَـفِّـه مثل غَيث(ن) يزفِّـه=للحَضَـر والشُواوي عَـقربِـيَّة رَعايد
وللذي جا تجَاهِـه كم تشَـفَّـع بجَاهِـه=وطَـنختِـه للعزاوي ترجِف أهل المكايد
والوطن وسط قلبه والعدو ما يغلبه=ركنَـنا اللي ركاوي عند صَـفْـق الضدايد
ومَن تسلل لـِ حَـدِّه سَـدّ عينه وردِّه=ومَن غَـدَر صار ثاوي بالفشق والحدايد
وعنده أغلى مراده رفع راية بلاده=سِـلْـم والا غزاوي بالجيوش الحشايد
فـ جِعْـل خالد وصيتَه بالجنان البخيتَه=وَالدَيِـنْ السناوي فيصلي الصمايد
ودام سيف القصيد راس مال الرصيد=جيت أجر الحداوي من ديار(ن) بعايد
ومع مزايا العريقه صار حلمي حقيقه=وكل نجم(ن) سماوي جعل ملفاه عايد
خطوة(ن) ما خطاها غير من هو عطاها=باليدين الرهاوي جَـزْل دعم ومدايد
