انا لله وإنا إليه راجعون ، بقلوب مؤمنة بقضاء الله وقدره ، انتقل الى رحمة الله تعالى " الشيخ مفرج بن مبارك السهلي ووري الثرى بمقبرة العويقيلة يوم الثلاثاء الموافق ١٠-٢-١٤٣٦ وقال إبنه إمام وخطيب جامع السندي بالعويقيلة الشيخ فراج بن مفرج السهلي " (بقلوب مطمئة ومحتسبة وراضية بقدر الله على العباد لانقول الا مايرضي ربنا الحمدلله على كل حال وانا لله وانا اليه راجعون اللهم آجرنا في مصيبتنا واخلف لنا خيرا منها ، وأرثي والدي المرحوم بإذن الله تعالى مفرج بن مبارك بن بعيجان البرازي السهلي رحمه الله تعالى وغفر له وجمعنا به في جنته ومستقر رحمته آمنين مستبشرين ،،آمين )
الحمد للي ماتعدد عطاياه=هو الرجا لاوصلت اليا التراقي
وعصر الثلوث اكيد ماراح ننساه=وقت الرحيل و وقت حل الفراقي
ابوي راح وباقي اليوم ذكراه=واليا ذكرت العود زاد اشتياقي
اشوفه قبالي وانا اشوف مركاه=وفي جلسته ودلال حلو المذاقي
وفي مسجده كرسي صلاته تركناه=لاشافته عيني يجيها اندفاقي
مرحوم ياللي حالنا من فقدناه=حال اليتيم اللي دموعه غراقي
ومرحوم ياللي بالمساجد عرفناه=دايم وعنده للصلاه استباقي
ومرحوم ياللي تبذل الطيب يمناه=مجمع على طيبه بكل اتفاقي
ومرحوم ياللي من لفى البيت حياه=ويفرح اذا كثرت عليه الطراقي
نومس ربوعه عند الاجناب طرياه=وفي خوته للناس مابه نفاقي
ريف الضعيف اليا تضايق تنصاه=وان شافه حجاجه يجيه انطلاقي
والجار يلقى حاجته قبل ينخاه=يرقى على شانه صعيب المراقي
ولو امدحه والله ما أحصي سجاياه=يكفيني ان ذكره مع الناس باقي
ونزالت البيب الشمالي اليا اقصاه=تشكر مواقيفه بحد العراقي
يالله عسى في جنة الخلد ماواه=وفي جنة الفردوس مااحلى التلاقي