اول اعراض المحبه التلعثم بالكلام=والتبسم دون داعي يعتبر ثاني عرض
ثم تبدا رحلة الاشواق في درب الهيام=والسؤال ان كان قلب الخل باحساسك نبض
وكان خلك ما يبادلك ابتسامك بابتسام=وما انكتب تمشون في درب المشاعر مع بعض
صارت الدنيا جحيم وتصبح احلامك حطام=وتبكي بليل التوجد كل ما ذكره ومض
وانت يوم اني عرفتك وابتدينا بالسلام=قلت في نفسي اخيرا حظي النايم نهض
وصحوة الحظ وْلو انه نايمٍ له الف عام=تنسي القلب المآسي كن عمره ماانقبض
هو تفاهم ! هو توافق ! هو مجرد انسجام !=ماعرف وش صاب قلبي بس احسه انتفض
زي طيرٍ كان غافي ثم بلله الغمام=فوق غصن الانتظار وبالجناحين إنتهض
ثم حام القلب فرحه مثلما هالطير حام=في فضا الامال واحرى بعد ياسه للعوض
جارك الله ياقليبي جارك الله ياحمام=لا رفع ذاك الجناج وذا الجناح ليا خفض
ويا عديل الروح جيتك حل ماجيتك حرام=وجيت رغبه باختياري لاعلى كره ومض
مقبله للنور اسعى من دهاليز الظلام=ومن لمح نور الامل من حالك الظلما ركض
ومن ضحك للصبح بعد الليل ما اظنه يلام=من يلوم اللي عن كتوفه غبار امسه نفض
وياصباح النور , نورك كان هو مسك الختام=يكفي ان الليل بعدك في دياجيه انغمض
قبل اعرفك والمشاعر حول موردهن حيام=جف , والراعي من الرمضا وهو ظامي رمض
وارتون من فيض ودك وانتهى عمر الصيام=وانتهى حكم الجداب اللي عل القلب انفرض
من لمحتك باللقا الاول لقلبي قلت هام=يوم بالحكي ارتبكت وقلت ذا اول عرض
ثم اعراضك توالت يا فديت الابتسام=حي والله هالمريض والله يديمك يالمرض