الشاعر: عبدالجبار المشيطي

سريتني يا صاحبي تالي الليل
وكنك تلمح لي بهجرك وصدك

وبعد الوناسه وإنسجام التعاليل
كن الوصل يا ريم ماهو بودك

هبلت بي يا ناعس الطرف تهبيل
وأصبحت ضايع بين جزرك ومدك

ولعبت بي يا كاحل العين بالميل
وضيعت فكري بين مزحك وجدك

وبعد القصيد وبعد كل التفاصيل
ما فيه من شعري ولا بيت شدك

واصبحت من وصلك قليل المحاصيل
وعن الوفا يالوافيه ويش ردك

ياجمل بشر بالارض يانجمة السهيل
عسى لهيب النار ما ينوش خدك

إعطف على قلب جراله بهاذيل
يوقف بجنبك ما وقف يوم ضدك

تكفين يابنت الرجال الحلاحيل
يا معربه بالساس من ساس جدك

يا بنت من في مدة يده يوفي الكيل
على الجفا ما فيه شين يحدك

وتستاهلين الطيب والبن والهيل
ويا ريم بعض الناس ماهو بقدك

أنتي كما مهره أصيله من الخيل
ويا طيب منطوقك وَيَا قو سدك

ومن فضل ربي ديرتك كلها سيل
وأنتي شماليه بقولك نعدك

والمعذره عن ما بقى من تحاليل
وياريم حل الوضع كله بيدك


الشاعر / عبدالجبار المشيطي